மகளிர் தின வாழ்த்துகள்

வஞ்சியவள்வரமே!!! 

 

🌺அழகில் தேவதையாய் 

அன்பின் ஆரம்பமாய் 

வீரத்தின் விதையாய் 

தீரத்தின் திமிராய் 

மழைச் சாரலாய் 

சீறும் புயலாய் 

கிழக்குச் சுடர் வானமாய்

புகழ்மிக்க திருத்தலாய் 

இந்த வஞ்சியவள் வரமே!!!! 

🌺ஒரு துளி உயிரணுவைப் பெற்று 

உதிரத்தால் உருமாற்றி 

 உருவாக்கும் உயர் வித்தகி 

ஈரைந்து மாதங்கள் கருவினில்

 மிச்சகாலமெல்லாம் 

மார்புக்கூட்டினுள் வைத்து

மகிழ்ந்திருக்கும் தவம் 

இந்தவஞ்சியவள் வரமே!!!!  

🌺அன்பெனும் வார்த்தைக்கு 

அகராதி தந்து 

அதீத சக்தியால் 

அகிலம் ஆளும் அத்தியாயம் 

வெயில் மழை பாராது 

கல்லும் முள்ளும் கடந்து 

துன்பங்களை தூசியாக்கும் 

வல்லமை 

இந்தவஞ்சியவள் வரமே!!!! 

🌺வாடி நிற்பவர்களுக்கு 

வாழ்க்கை விடியல்களை 

பிரசவிக்கும் 

சுடர் மிகு வைகறை வானம் 

பொல்லார் கொடுமை 

கண்டு பொங்குகையில் 

புயலைக்கூட தோழனாக்கும் 

பூமகள் 

இந்தவஞ்சியவள் வரமே!!!! 

🌺துணைகண்டு மனைகண்டு 

மண்ணில் மகளிர் மாண்பு 

காத்து நிற்கும் மாதவம் 

உரிப்பதற்கும் எரிப்பதற்கும் 

விறகல்ல 

விதைகளை நல்விருட்சங்களாக்கும் 

வியத்தகு விந்தை கற்றவள் 

இந்தவஞ்சியவள் வரமே!!!! 

🌺இடிகள் பலவும் தாங்கிய 

இன்முகத்தாள் 

ஞாலமெனும் ஆலயத்தில் 

ஞான ஒளியாய் 

மதம் பிடித்த மனிதனுக்கு 

மறக்காமல் மனிதம்

கற்றுத் தரும் மாமேதை 

இந்தவஞ்சியவள் வரமே!!!! 

🌺விறகாய் சருகாய் 

வெந்து தனியாமல் 

வெற்றுத் தோட்டத்திலும் 

வைரமணி கண்டெடுத்து

புலர்கின்ற விடியல்களை 

பூபாள ராகம் இசைத்து 

நடைதோறும் நம்பிக்கை 

காற்றை விதைக்கும் 

இந்தவஞ்சியவள் வரமே!!!! 

🌺தன்னேரில்லா தகைமையாய் 

தரணியில் தமிழ் போல் 

தலைநிமிர்ந்து நிற்கும் 

தங்கமகள் 

இந்த வஞ்சியவள் வரமே!!!! 

🌺வரமாய் வந்த மகளிருக்கு 

மகளிர் தின வாழ்த்துகள் 💐💐💐