கடிதத்தின் நேசம்

கடிதம் எனும் கானல் நீர்......

✍️கடிதம் 

 சிறகு முளைத்த பந்து 

இறகு முளைத்த இதயம் 

கடிதம் காகிதம் அல்ல 

வாழ்வின் அங்கமான 

காலங்கள் நினைவுகளாய்!!

✍️கடிதம் 

 காதலர்களுக்கு 

அன்பு பரிமாற்றம் 

விடுதி மாணவர்களுக்கு 

பெற்றோரின் பாசப் பகிர்வு 

நட்பு வட்டங்களுக்கு 

எல்லாமும் பகிர்ந்திடும் நாளிதழ் 

உறவுகளை உள்ளன்போடு 

இணைத்திடும் உறவுப்பாலம்!!

✍️ கடிதம் 

பலநேரம் ஒப்பனைகளோடு

 அழகான கையெழுத்தால் 

அலங்கரிக்கப்பட்ட மலர்மாலை 

சில நேரம்அவசரகதியில்

 அர்த்தம்  மட்டுமே 

விளங்கிக் கொண்டால் 

போதும் என கிறுக்கிடும் 

மழலைக் கீறல்கள் !!

✍️கடிதம் 

 நிச்சயம் முடித்துச் சென்ற 

மணமக்களின்

ஏக்கங்களுக்கும் 

தவிப்புகளுக்கும் 

மயிலிறகால் 

 வருடிச் செல்லும் 

அற்புத மருந்து !!

✍️அன்று 

இன்செய்தி கொண்டு வரும் 

அஞ்சல்காரரைக் 

கட்டி அணைத்துக் 

கொண்ட காலம் 

துன்ப செய்தியில் 

அஞ்சல்காரின் 

விரல் பிடித்து 

தோல் சரிந்து 

ஆறுதல் தேடிக் 

 கொண்ட காலம் - இன்று 

எல்லாமும் கானல் நீரே !!

✍️அன்று 

கடிதத்தின் வார்த்தைகளில் 

உணர்வுகளோடு 

முகம் கண்டு ரசித்து 

என் மருமகன் 

என் மருமகள் என்று 

உறவு கொண்டாடி 

மகிழ்ச்சியின் 

உச்சம் தொட்ட காலம் -  இன்று 

கானல் நீரே !!

✍️அன்று 

படித்து முடிக்கப்பட்ட கடிதங்கள் 

மிக முக்கிய ஆவணங்கள் 

நலம்.  நலமறிய ஆவல்? 

எனத்தொடங்கும் கடிதத்தில் 

ஆடு , மாடு , கோழி , குருவி 

விசாரிப்பு தொடங்கி 

தோட்டத்து கத்தரிக்காய் வரை 

அத்தனை விசாரிப்புகளும் 

ஆழமாய் அடங்கிவிடும் !!

✍️பலருக்கு எழுத்துக்கூட்டி 

படிக்க கற்றுக் கொடுத்ததே 

கடிதமெனும்  இக்காவியமே !!

பிழையின்றி ஒரு கடிதம் 

எழுதினால் பலநூறு பட்டங்கள் 

பெற்றுவிட்ட பூரிப்பு !!

✍️அன்று 

பேனாவில் உருவான 

நட்பு வட்டம் -  இன்று 

முகம் தெரியா 

முகவரி அறியா 

முகநூல் நண்பர்களுடன் 

நட்புவட்டம் புலன வழியில்

மாறி விட்ட காலம் !!

✍️இன்று கடிதம் 

மொழிப் பாடத்தில் 

திறன் வளர் பயிற்சியாய் மட்டுமே

மாணவர்கள் மத்தியில் !!

✍️எழுதுகோல் பிடித்து 

மடல் வரையும் பழக்கம் 

மறைந்ததால் 

செல்லிடை பேசியில் 

சொடுக்கு விடும் நொடியில் 

அத்தனையும் 

பகிரப்படுகிறது 

உறவில்லாமல் 

உணர்வில்லாமல் 

உயிரில்லாமல்... 

✍️கடிதமும் நம் கலாச்சாரமே 

காலங்கள் மாறினாலும் 

மண்வாசனை மாறிடாத  

பண்பாடு நம் பண்பாடு........

போற்றிடுவோம் 

நம் கலாச்சாரத்தை....