உலக பூமி தினம் ஏப்ரல் 22

🌱அனுதினமும் உம் துதி சொல்ல 

     வேண்டிய நாங்கள் 

      வருடத்தில் ஒரு நாள் 

      உமை நினைக்க ஏப்ரல் 22 

      உலக பூமி தினம்!

  

🌷 நீ தந்த இயற்கையின் 

   இன்பத்தில் திளைத்திட இந்த

   ஒரு ஜென்மம் போதாது 

   🌷ஈரைந்து மாதங்கள் மட்டுமே 

   என் அன்னையின் கருவில் 

   வாழ்நாளின் மிச்ச காலமெல்லாம் 

   உன் மடி மீது தானே பூமா தேவியே!

  🌷 ஒன்றா இரண்டா ஒரு கோடி 

   நன்மைகள் அல்லவா! நீ தந்தது 

   🌷நிலையில்லா உலகில் 

  நிஜமில்லா பொழுதுகளில் நான் 

  நிற்பது நடப்பதும் _  நீ என்னைத் 

  தாங்குவதால் தானே தரணித்தாயே!

 

🌷அகழ்வாரைத் தாங்கும் நிலம் போல 

  என வாழ்வுக்கு இலக்கணம் தந்த 

  வள்ளுவருக்கு வரிகள் தந்தாயே!

  🌷உறவுகளோடு உள்ளம் மகிழ 

  சுவாசம் தந்தாயே!

 🌷 அடுக்கு மாடிகளில் ஆடம்பரமாய் 

  வாழ ஆயுள் தந்தாயே!

  அத்தனையும் மறந்தோம் 

                            பூமித்தாயே !

🌱நவீனமாகிப்போன நாகரிகத்தில்     நெகிழியால் உன் நெஞ்சில் 

                         உதைத்தோம் 

 🌱குப்பைகளால் உன் 

                         குறுக்கொடித்தோம் 

🌱வேதிக்கழிவுகளால் உன் 

  வேரறுக்க நினைத்தோம் 

🌱பணமே எல்லாமும் ஆன கலிகாலத்தில் - நீ 

கற்றுக் கொடுத்த பண்புகளை  

                       மறந்தோம்!

 🌱மனித மனம் குறுகி 

உனைத் துண்டாடும் போது 

உள்ளம் உருக்குலைந்திடும் 

                          புவித்தாயே! 

🌱அகிலமே ஆண்டாலும்,

அடங்கப்போவது என்னவோ

உன் ஆறடிக்குள் தானே!

 

மன்னித்து விடும் மகத்துவமே!

 

🌱என் வரும் தலைமுறை காத்திட 

உன் அருமை உணர்ந்து 

மரங்களால் உனை அலங்கரித்து 

மாசற்ற பூமி காத்திடுவோம்!